ភ្នំពេញ៖ ប្រធានក្រុមឧត្តមប្រឹក្សាព្រះមហាក្សត្រសម្ដេចតេជោ ហ៊ុន សែន បានថាភរិយារបស់សម្ដេចគឺ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ពេលនេះកំពុងសម្រាកព្យាបាលនៅមន្ទីរពេទ្យកាល់ម៉ែត្រជាមួយនឹងសុខភាពល្អប្រសើរ។

សម្ដេចតេជោថា៖ «២ថ្ងៃចុងក្រោយនេះមានការផ្សព្វផ្សាយនូវព័ត៌មានដែលនិយាយពីភរិយាខ្ញុំមានជម្ងឺ។ នេះវាជារឿងពិតហើយក្រុមគ្រួសារខ្ញុំក៍គ្មានការលាក់បាំងនិងក៍គ្មានការចាំបាច់ផ្សព្វផ្សាយជាដំណឹងអ្វីដែរ»។

សម្ដេចបានឲ្យដឹងថា កាលពី៤ថ្ងៃមុនសម្ដេចកិត្តិព្រឹទ្ធបណ្ឌិតបានដួលក្នុងបន្ទប់សម្រាកធ្វើឱ្យប៉ះដល់ក្បាលដែលចាំបាច់ត្រូវយកទៅពិនិត្យនិងព្យាបាលនៅមន្ទីរពេទ្យកាលម៉ែត្រ។ សម្ដេចថាបន្ទាប់ពីការពិនិត្យព្យាបាលដោយយកចិត្តទុកដាក់ពីគ្រូពេទ្យពេលនេះសុខភាពសម្ដេចកិត្តិព្រឹទ្ធបណ្ឌិតល្អប្រសើរតែមិនទាន់ចាកចេញពីមន្ទីរពេទ្យនៅឡើយព្រោះត្រូវរង់ចាំការថតក្បាលជាលើកទី៣ ដើម្បីមើលសរសៃដែលរងនូវការប៉ះទង្គិចនោះ។

សម្ដេចបានច្រានចោលព័ត៌មានដែលថា សម្ដេចកិត្តិព្រឹទ្ធបណ្ឌិតកំពុងបញ្ជូនទៅព្យាបាលនៅបរទេស។

ជាមួយគ្មានេះសម្ដេចបានទូលព្រះបង្គំអរព្រះគុណថ្វាយហ្លួងម៉ែដែលបានយាងទៅសួរសុខទុក្ខសម្ដេចកិត្តិព្រឹទ្ធបណ្ឌិតដែលជាបុត្រីធម៍របស់ព្រះអង្គដលមន្ទីរពេទ្យ និងអរគុណថ្នាក់ដឹកនាំគ្រប់ជាន់ថ្នាក់បងប្អូនជនរួមជាតិដែលចូលរួមកង្វល់ពីសុខភាពភរិយាសម្ដេចផងដែរ។

សម្ដេចបន្ថែមថា៖ «ឆ្លៀតឱកាស់នេះក៍សូមជូនសារទៅពួកអាក្រក់សូមបញ្ឈប់នូវការបំពុលព័ត៌មាននិងសូមយកចិត្តទុកដាក់ ការពារសុខភាពខ្លួនឯងល្អជាងមកគិតពីក្រុមគ្រួសាររបស់ខ្ញុំ»៕